Վենետիկը (իտ.՝ Venezia) քաղաք է Իտալիայում։ Կառուցված է 118 կղզիների վրա: Քաղաքը հատում են 170 առվակ ու ավելի քան 400 կամուրջ:
Այն նման է քաղաք հուշարձանի, որտեղ ամեն մի կառույց մի յուրահատուկ պատմություն ունի: Ամեն տարի Վենետիկ են այցելում ավելի քան 18 մլն մարդ, իսկ ամեն օրյա հաշվարկով՝ 50 հազար: Փորձագետների կարծիքով, մինչև 2030 թ. Վենետիկը հնարավոր է դառնա քաղաք-ուրվական, ուր զբոսաշրջիկները կայցելեն միայն առավոտյան և կգնան երեկոյան:
Վենետիկի ամենագլխավոր տեսարժան վայրը Սուրբ Մարկոսի հրապարակն է, որտեղ անհամար զբոսաշրջիկների հիացմունքին է արժանանում նույնանուն տաճարը։ Սուրբ Մարկոսի տաճարի մուտքի վերնամասում իրենց վեհ կեցվածքով դարեր շարունակ բոլորին դիմավորում Է չորս նժույգների արձանախումբը, որն ի դեպ, Հռոմում, 66 թվականին, հայոց Տրդատ թագավորն իր թագադրության ժամանակ նվիրել է Ներոնին, իսկ 1204 թվականին դրանք հասել են Վենետիկ: ժամանակին այստեղ՝ Վենետիկի Հանրապետությունում, տեղի Է ունեցել պատմական իրադարձություն, երբ Կիլիկյան Հայաստանի վերջին տիտղոսավոր թագուհի Կատերինա Կորնարոն ժամանելով Վենետիկ, Կիպրոսը հանձնել Է Վենետիկի Հանրապետությանը՝  հիմք դնելով պատմական ռեգատային, որ կրկնվում Է ամեն տարի։ Ի դեպ,Կիլիկյան Հայաստանի վերջին տիտղոսավոր թագուհու աճյունն ամփոփված Է Վենետիկի Սուրբ Սալվադոր տաճարում` տապանաքարին համապատասխան գրությամբ:
Վենետիկի Սաս Զուլիան թաղամասի Հայկական փողոցում է գտնվում 1434թ.հիմնադրված հայկական Սուրբ Խաչ եկեղեցին։ 1740 թվականից եկեղեցում պաշտամունք են կատարում Մխիթարյան հայրերը։ Սուրբ Խաչը Իտալիայում միակ միջնադարյան եկեղեցին Է, որ գործում Է մինչ օրս։ Սուրբ պատարագները մատուցվում են միայն հայկական ծեսով՝ յուրաքանչյուր ամսվա վերջին կիրակի օրը, ժամը 10:30-ին։ Տեղեկացնենք նաև, որ Եկեղեցին բաց Է միայն կիրակի օրերը։
1850 թվականից Վենետիկի ամենագեղեցիկ, Tiepolo–ի ու Louis Dorigny-ի որմնանկարներով հարուստ Պալացցո Զենոբիո (Palazzo Zenobio) պալատում է գտնվում Մուրադ-Ռաֆայելյան վարժարանը, որը Մխիթարյան միաբանության կողմից հիմնադրված, մեծ հեղինակություն վայելող, հայագիտության հանճար հսկայական աշխատանք կատարած կրթօջախներից է։ Բազում հայորդիներ դաստիարակվել են այստեղ «Հայրենիքի և Աստծո փառքի համար»։
Այստեղ են սովորել նաև հայ մեծ բանաստեղծ Դանիել Վարուժանը, դերասան Վահրամ Փափազյանը, երաժիշտ Գուրգեն Ալեմշահը և շատ ու շատ ուրիշ մեծանուն հայ մտավորականներ։ Ուշագրավ է պալատի «հայելիների սրահը», որտեղ նկարահանվել են համաշխարհային համբավ վայելող ֆիլմեր։
Վենետիկում հայոց աշխարհի խորհրդանիշ է համարվում Սուրբ Ղազար կղզին, որտեղ 1717 թվականից գտնվում է հայկական Մխիթարյան միաբանությունը, որի հիմնադիրն է Մխիթար Սեբաստացին։ Միաբանությունը Եվրոպայի սրտում գտնվող Հայաստանի մի մաս է, որը դարեր ի վեր ծավալել է գիտամշակութային և կրոնադաստիարակչական գործունեություն։ 1773-ից միաբանությունից առանձնացել էր մի թև և հաստատվել Վիեննայում, իսկ ահա 2000 թվականին միաբանությունները միավորվել են։
 

07 Ապրիլի 2024, Կիրակի | 1976