Կաբո Սան Լուկաս կամ պարզապես Կաբո (իսպաներեն՝ Cabo San Lucas, Իսպաներեն արտասանություն՝ [ˈkaβo san ˈlukas] , թարգմանաբար նշանակում է «Սուրբ Ղուկասի հրվանդան»), առողջարանային քաղաք Մեքսիկայի Բախա Կալիֆոռնիա Սուր  նահանգում՝ Կալիֆոռնիա թերակղզու հարավային ծայրին։ 2015 թվականի տվյալներով նրա բնակչության թվաքանակը եղել է 81.111 : Կաբո Սան Լուկասը հարևան Սան Խոսե դել Կաբո քաղաքի հետ մեկտեղ ձևավորում է Լոս Կաբոս անվանումով հայտնի մետրոպոլիսային տարածքը, որտեղ 2015 թվականին ապրում էր շուրջ 306 հազար մարդ։
Կաբո Սան Լուկասը համարվում է Մեքսիկայի հինգ լավագույն զբոսաշրջային վայրերից մեկը ։ Հռչակվել է իր լողափերով, ջրասուզակների համար ստեղծված հարմարություններով, հանքային բուժիչ աղբյուրներով ու դրանց օգտագործմամբ համբավված առողջարաններով , El Arco de Cabo San Lucas ծովային կամարով, ծովային զվարճությունների համար առկա պայմաններով, գիշերային աշխույժ կյանքով։
Կաբոյի մերձակա ծովային ջրերը հայտնի են կենդանական հարուստ աշխարհով, ընդ որում՝ այստեղ հանդիպում են նաև կատվաձկներ , շերտավոր թրաձկներ, շնաձկներ , մախի-մախի (դորադո), երբեմն հայտնվում են նաև կետեր։ Կաբո Սան Լուկասի մերձափնյա ջրերում ամեն տարի հոկտեմբեր ամսին անց է կացվում թրաձկան որսի ամենաթանկ ու ամենախոշոր մրցաշարը, որը հայտնի է «Բիսբի Լոս Կաբոսում» անվանումով։

06 Ապրիլի 2024, Շաբաթ | 989