Կահիրեն՝ Եգիպտոսի ներկայիս մայրաքաղաքը (արաբ.՝ القاهرة՝ ալ-Կահիրա) տեղաբաշխված է Եգիպտոսի հյուսիսային մասում՝ Նեղոս գետի երկու ափերով ՝ գտնվելով այն մասում, որտեղ  գետը ճյուղավորվում է՝ ձևավորելով դելտան:
Կահիրեի հնագույն հատվածն ընկած է Նեղոսի արևելյան ափի վրա. այդ կետից էլ քաղաքը սկսեց աճել դեպի արևմուտք: Քաղաքի արևմտյան շրջանները հիմնվել են 19-րդ դարում եգիպտացի կառավարիչ Իսմայիլ փաշայի կողմից: Նրա արևմտյան թաղամասերի նախագծումը արվել էր 19-րդ դարի Փարիզի օրինակով և ներառում է ընդարձակ ծառուղիներ և այգիներ:
Կահիրեի կենտրոնում է գտնվում կանաչ Գեզիրա (Զամալեք) կղզին, որի վրա գտնվում են դեսպանություններ, խոշոր կազմակերպությունների ներկայացուցչություններ, ժամանակակից բիզնես-կենտրոններ, հինգ աստղանի հյուրանոցներ:
Արևելյան մասը քաոտիկ կերպով կառուցվել է հարյուրամյակների ընթացքում, այստեղ շատ են բազմաբնակարան շենքերով նեղ փողոցները: Այնտեղ են գտնվում նաև հարյուրավոր հին մզկիթներ:
Կահիրեն համալսարանական կենտրոն է, Աֆրիկայի խոշորագույն քաղաքն է, ինչպես նաև միակն է մայրցամաքում, որտեղ կա բազմաճյուղ մետրոպոլիտեն:

05 Մայիսի 2024, Կիրակի | 908