Գտնվում է Իտալիայում Պիզա քաղաքում եւ համարվում է Սանտա Մարիա Ասսունտա տաճարի զանգակատունը:

 Հայտնի աշտարակի շինարարությունը իրականացվել է երկու փուլով, եւ երկու ընդմիջում է արվել, ընդ որում բավական երկար: Շինարարությունն իրականացվել է 1173-1360 թվականներին: Աշտարակի թեքվելու պատճառներն անհայտ են, սակայն ենթադրվում է, որ դա տեղի է ունեցել ստորերկրյա ջրերի պատճառով, որոնք տակից ողողելով զգալիորեն խարխլել էին հիմքը, կամ էլ աշտարակի հիմքերը հուսալի չեն եղել:
 Մինչեւ այն պահը, երբ այն դեռ չէր վերականգնվել, նրա թեքվածությունը դեպի հարավ 5,5 աստիճան էր: Այս պահի դրությամբ աշտարակը թեքված է ընդամենը 4 աստիճանով:

 «Ընկնող աշտարակի» շինարարությունը սկսել է վարպետ Բոննանո Պիզանոն: Երբ տեսանելի է դարձել աշտարակի թեքվածությունը, արդեն իսկ առաջին հարկը եւ սյուների երկու օղակները կառուցված էին: Շինաշխատանքները դադարեցվել են, իսկ վարպետը լքել է քաղաքը:

 Աշտարակն ունի յոթ զանգեր, եւ դրանք բոլորն էլ հարմարեցված են երաժշտական ​​ յոթ նոտաների վրա: Պիզայի աշտարակի զանգակատունը համարվում է ամենագեղեցիկ հնչեղություն ունեցողը:

 Կա մի լեգենդ, ըստ որի Պիզայի աշտարակում է իր փորձերն արել Գ.Գալիլեյը: Ասում են, որ գիտնականը կանգնում էր աշտարակի վերին հարկում եւ վայր էր նետում տարբեր առարկաներ: Նա փորձում էր ապացուցել, որ անկման արագությունը կախված չէ ընկնող մարմնի զանգվածից:

Պիզայի աշտարակի բարձրությունը կարելի է համեմատել ութ հարկանի շենքի հետ: Իտալիայի այս տեսարժան կառույցը կշռում է 14 453 տոննա:

 Ի սկզբանե նախատեսված է եղել, որ աշտարակը պիտի ունենա 10 հարկ, եւ նրանք պիտի լինեին պատշգամբներով, իսկ աշտարակի բարձրությունը պիտի 98 մետր լիներ, մինչդեռ կառուցվել էր միայն 56 մետր:

03 Հուլիսի 2024, Չորեքշաբթի | 2248